آيـــم ــــــآن

تنويه :: القصيدة كتبها الشاعر بلسان حال اخيه بعد وفاة زوجته بأيام معدودات من زواجهم ...



محتاج اشوفج ولو ,,, بس لحظه مريلي



خلصت عيني دمع ,,, ياعين تبجيلي؟؟



من يوم غبتي علي ,,, وانه شثكَل ليلي



مرات احاجي الصور ,,, ومرات تحجيلي



ومن خلص حيل الصبر ,,, ظل ياكل بحيلي



لوليلي طال السهر ,,, بحب كبَل لوليلي



دللّول السهر خليته بجفاج


ودللّولج مشت للمكَبره وياج



أيمان محتاجلج ,,,يل وحشتج وحشه



استعجلتي عالمكَبره ,,, ورحتيله مغبشه



طير انه جنحي انكسر,,, والطير من ينجرح

ينزف قهر عشه



ونعش الموادع دمع ,,, كَد الأرض نعشه



مابيج ردي علي ,,, حته اضحك أعله الحزن,,, وكَبال عينه اجي

او وياج اتمشه



انساج رادو لجن ,,, موسهله انه انسه



بكنتورج امسفطه ,,, اثياب العرس لسه



زغيره بعدج تره ,,, والبارحه معرسه



جنتيلي كلشي امس ,,, الضحكه والونسه



والبيت اظلم وجه ,,, مذبوحه بي شمسه



ميته واباوع الج ,,, جن كَاعده من الفجر
وعيونج منعسه



ولح بيه صوت الحزن ,,, وصوت الحزن من يلح



يشلع وجه ضحكتي ,,, ويبوك حيل الجنح



ويموت ورد العمر ,,, ويشيعه دمع الفلح



وكلي بغيابج جرح ,,, وفراشي صاير ملح



واتخيلي أعله الملح ,,, يكدر يغمض الجرح ؟؟؟



حال العليه صعب ,,, صدكيني ماينشرح



اغفه بألم حركتي ,,, وحلم النواعس حلم


لو يصح لو مايصح



حسبالي انتي لمن ,,, تندهني أمي الصبح



انساج صعبه تره ,,, وبحالي انتي ادره



بالبيت وبكل شبر,,, موجوده الج ذكره



صدري اختنك بالقهر ,,, حدما خلص صبره



والبيت كله انكَلب ,,, وتحول لعبره



للموت ازورج اضل ,,, واشعلج أشموعي



ولو ردت اغسل الكَبر ,,, ما اجيب ماي الورد

اعصرلج دموعي



بضلوعي نارج تضل ,,, ولو يوم تطفه شرط ,,,احترك َكلي ألج
حته اشعل ضلوعي



للمبدع
مهند السيد هاشم