ما اغلط وكلك ذنب الاملاء!!!!!!!!

القصيده ام نبي


شاعر وبمحيطي تعيش الاشياء



اكتبلك صور برموش العيون



مااغلط وكَلك ذنب الامــلاء



الرسام يعرف يمزج اللون



اليغارون كلهم بلا استثناء




ماكَدرو حرف مثلي يكتبون



آنه الاستاذ من الالف للــياء



قلم شفاف يعكس واقع الكون



شفنا اهواي للابداع اعداء



حقد برواحهم للان مسجون



آدري ارواحهم صحراء جرداء



وظمائرهم جثث بيها يدفنون



الما يعرف العله يشخص الداء



لايكتب نقد عكس اليكنبون



آول اسم اسمي ابين الاسماء



عراقي وتاج راس المايميزون



آنه حروفي قصائد كلها عصماء



ازرع ورد مو مثل اليزرعون



مامحتاج منك كلمه اطراء



ولا محتاج منك اطلب العون



عندي القلم سيف وورايه بيضاء



اسهر اليل بعيون اليسهرون



آذا عصاة موسى تصير عنقاء



ماينفع بعد سحرك يفرعون



آكتب عن وعـي وتحاشه الاخطاء



وخلي لدوله العشاق قانون



عليه اتسلطت مجبوره الاضواء



وخطفت اضواء سحري من اليخطفون



آنه اكتب شعر مااكتب انشاء



اعلمك عالوفه ومااعلمك اتخون



ناس اهواي ميته وهمه احياء



وناس اهواي ميته ومايموتون



الابداع حـاله اتخلد الاشياء



المبدع من يموت بشعره يحجون



كَالـو عالقصيده اتريد القاء



حتى تعيش بذهان اليسمعون



للـجـف الحلو ماحاجه حـنـاء



القبيح يضل قبيح شما يصبغون



الكتبولك شعر وتذكره الانباء



بالابداع للابداع يمشون



مر بيه العطش وبحضره الماء



ولا ذليت روحي اويه اليذلون



ابو الانسان ادم وومه حواء



والانسان ضل بفعله مرهون



بعض الضن اثم قل هذا ماجاء



بنص قرءان ربك لليضنون



الشعر كَالو بحر وومواج رعناء



وناس اعلى الجرف خافو يغركَون



الخاف من البحر لايشتم الماء



ولا يسبح ابد ويه اليسبحون



القصيده ام نبي وعرفها عذراء



وخاف الناس عنها بسؤ يحجون




ليش من الحقيقه البعض يستاء



الـماعنده ادب مالازم يكون



آنه بدرس المشاعر ماخذ اعفاء



مااغلط وصحح لليغلطون



الشاعر

حسن خليفه




تحيتي واحترامي لكم